ایک الوداعی نظم برائے طالبات

الوداع   الوداع  اے  بہارِ چمن
الوداع الوداع مخزنِ علم و فن

اک عجب کیفیت رنگِ محفل میں ہے
آنکھ پْرنم ہے، کیسی کسَک دل میں ہے؟
ہم کو احساسِ فرقت ستانے لگا
رو رہا ہے یہ دل، جان مشکل میں ہے

شفقتوں پہ تیری ہے فدا جان و تن
الوداع  الوداع  اے  بہارِ چمن
الوداع الوداع مخزنِ علم و فن

▪︎▪︎▪︎▪︎▪︎▪︎

رب کی رحمت ہوئی تیرے در آگئے
باغباں! تیرے سائے میں پلتے رہے
مادرِ عملی! ہم تیری شہزادیاں
مثلِ گُل تیرے دامن میں کھلتے رہے

خواب سا سب لگے ہے، یہ کہتا ہے من
الوداع الوداع باغبانِ چمن
الوداع الوداع تحفہء ذو المنن

 ▪︎▪︎▪︎▪︎▪︎▪︎

شدتِ غم سے سکھیوں کی خم ہے جبیں
شَملہ اکمل خیالوں میں گم ہیں کہیں
ام سلمی، ثنا غم سے معمور ہیں
طوبی تسنیم کا غم بھی کچھ کم نہیں

ضبطِ گریہ ہے اب ، نہ مجال سخن
الوداع الوداع بُلبُلانِ چمن
الوداع، ہم چلے چھوڑ کوئے چمن

▪︎▪︎▪︎▪︎▪︎▪︎

غم سے بیتاب ہے شملہ انجم کا دل
رو رہا ہے مضیئہ، شہانہ کا دل
پیاری فرحانہ ہو یا ہو طوبی نسیم
آہ و فریاد و نالہ کناں سب کا دل

غم کی تعبیر کیسے کریں ہم سخن
الوداع الوداع بُلبُلانِ چمن
الوداع، ہم چلے چھوڑ کوئے چمن

▪︎▪︎▪︎▪︎▪︎▪︎

کیف مستی بھری محفلیں اب کہاں
کہہ رہی ہیں سُمیہ کی بیتابیاں
یادِ ماضى میں رضوانہ گُم ہیں کہیں
ہیں نشاط و ثمامہ بآہ و فغاں

غم سے رنخور دل، کہہ رہا ہے یہ من
الوداع، ہم چلے چھوڑ کوئے چمن
الوداع الوداع بُلبُلانِ چمن

▪︎▪︎▪︎▪︎▪︎▪︎

محفلیں ایسی ملنا تو ممکن نہیں
ہم رہیں گے کہیں وہ کہیں تم کہیں
اک لڑی کے ہیں موتی، بکھر جائیں گے
آؤ سکھیاں گلے مل کے رولیں یہیں

پیار ہم سب کا مانندِ بوئےخُتن
يوں مہکتا رہے گا سمن در سمن
الوداع، ہم چلے چھوڑ کوئے چمن

▪︎▪︎▪︎▪︎▪︎▪︎

تیری آغوش میں فیض پاتے رہے
علمِ قرآن وسنت کے حامل بنے
میرے گہوارہ علم مثلِ حرا!
اپنے دامن میں موتی سجاتے رہے

دل عقیدت کے جذبات سے موجزن
تیرا یوں ہی سلامت رہے بانکپن
الوداع الوداع مخزنِ علم و فن

▪︎▪︎▪︎▪︎▪︎▪︎

جاتے جاتے سنو اے میرے ہمنوا!
ربِ کونین سے آؤ مانگیں دعا
یالہی! ہمیں خیر ہی خیر دے
تو ہمیشہ ہمیں راه ِ حق پہ چلا

ہم جہاں بھی رہیں، رکھ ہمیں خندہ زن
الوداع الوداع نِگہَبانِ چمن
الوداع ہم چلے چھوڑ کوئے چمن

▪︎▪︎▪︎▪︎▪︎▪︎

آج اختر کی آنکھیں بھی نم ہوگئیں
دورِ ماضی کی یادوں میں ضم ہو گئیں
مثلِ اِمروز کتنی جواں محفلیں
دیکھتے دیکھتے کالعدم ہو گئیں

صرف دل میں لئے نقشہائے کہن
الوداع، ہم چلے چھوڑ کوئے چمن
الوداع الوداع محفلِ انجمن

▪︎▪︎▪︎▪︎▪︎▪︎