آزادی کا گیت

تاریخِ ہند کے پَنٌوں پہ ہے "جہدِ مسلسل” آج کا دن

جبر و غلامی، قید و بند سے "آزادی” ہے آج کا دن

پیار و محبت، یکجہتی کا سبق سکھائے آج کا دن

"آج کے دن آزاد ہوئے ہم” گیت یہی دہرائیں گے

آج کے اس پیغام کو ہم اِک دوجے تک پہنچائیں

☆☆☆☆

آج یہ دن آزادی کا ویروں کی یاد دلاتا ہے

دیش پہ جو قربان ہوئے پُرکھوں کی یاد دلاتا ہے

مر کے بھی جو اَمَر بنے، یہ گیت انھیں کے گاتا ہے

ہم سب اَمَر جوانوں کی مل چل کر یاد منائیں گے

آج اسی پیغام کو ہم اِک دوجے تک پہنچائیں گے

☆☆☆☆

سونپ ہمیں یہ پیارا گلشن، جو خود تو جگ چھوڑ چلے

برسوں دیکھے سپنوں کی تعبیر ہمیں دی، اور چلے

بولے: اس گلشن میں ہرسُو سچائی کی جوت جلے

اس پیارے گلشن میں ہم الفت کی جوت جلائیں گے

آج اسی پیغام کو ہم اِک دوجے تک پہنچائیں گے

☆☆☆☆

گاندھی جی کے آدرشوں کی ایک نئی تفسیر ہے تُو

مولانا آزاد کے دیکھے خوابوں کی تعبیر ہے تُو

آزادی کے متوالوں کی، اِک روشن تقدیر ہے تُو

نگری اے ارمانوں کی! تجھے جنت نشاں بنائیں گے

آج اسی پیغام کو ہم اِک دوجے تک پہنچائیں گے

☆☆☆☆

آؤ آؤ ہم سب مل کر یہ عہد و پیمان کریں

کام ہمارے ایسے ہوں جو دیش کی اونچی شان کریں

دیش کی خاطر ہم سب اپنے تن من دھن قربان کریں

جوش نیا ہے، نئی امنگ ہے کچھ کرکے دِکھلائیں گے

آج اسی پیغام کو ہم اِک دوجے تک پہنچائیں گے

☆☆☆☆